مساهمه شعريه عن رمضان

رمضان شهر الفضل والكرم والخيرات
شهر المأكولات والمشروبات والحلويات
وأهمها الشوربة والسمبوسك والكنافات
والله الله على السوبيا والبليلة واللقيمات
كل دا تاكله وتقول يالله كمان هات وهات
*****
والشباب سهر للصبح ونهار في أحلى منامات
تسكّع في الشوارع ولعب وكورة ومباريات
والحريم شغالين ما بين خرجة ودخلة وزيارات
وخروج لتراويح ومن مسجد لمسجد في تنقّلات
*****
أما الفضائيات وما أدراك ما الفضائيات
فوازير بالهبَل وبرامج ومسابقات
حفلات غنا ء وخيمات رقص وسهرات
وفيديو كليب وأفلام تعبانة ومسلسلات
ترى كل ما تقدم من أركان رمضان ومن الواجبات
كيف ما تبغى الناس تحب شهر مليان بالملذّات
*****
لا تصدقوني تراني متألم على ما ذكر من صفات
حزني عليك يا رمضان يا أبو الفتوح والغزوات
يا أبو الأجور والكرم والحسنات المضاعفات
سلفنا الصالح لو شافوا مسلمين اليوم والمسلمات
كان اتندموا كثير وتحسّروا على ما كان زمان وفات
كيف يكون هذا حال مسلمين ومؤمنين ومؤمنات
كيف يبغوا يكسبوا بحالهم هذا أي أجور وحسنات
صيامهم ما حيكون إلا جوع وعطش وندامات
وصلاتهم وقيامهم جهد وتعب وبدون أي جزاءات
انتبهوا من لعبة إبليس يا مؤمنين ويا مؤمنات
أشغلكم بالتوافه والعبث وضيع عليكم الفائدات
*****
رمضان شهر الكرم والصدقة والجود والعطاءات
في كل ليلة عتق من النار وفيه تفتح أبواب الجنات
وفيه ليلة خير من ألف شهر بما فيه من أيام وساعات
وفيه تستغفر الملائكة لكل الصائمين والصائمات
ودعاء الصائم عند فطره من الدعوات المستجابات
كل هذا الفضل اللّي ذُكر ولسّة بنفكر في ملذات
لا تحزن لا تيأس إحنا لسّه في بداية الأوقات
قدامنا فرصة للتوبة وبذل الجهد والتضحيات
عسى نحصّل ما نقدر من موسم الخير والجنات
*****
يالله شمّر يا مسلم واطرد عنّك الكسل والشهوات
ابدأ صفحة جديدة مع الله في موسم الخير والعطاءات
عساك تفلح وتُكتب آخر الشهر من الفائزين والفائزات
ومن اللّي يستلموا بيمينهم اثمن وأغلى الصحيفات